عادة اذا الانسان عندو مرا حلوي كتير بينفر منّا بعد عشر سنين، كيف اذا كان عندو دكر حرزان متلك. والله أكبر أعجوبة انو بعدني بحاكيك.
بأيش ملهي بهالايام؟ ليش ما بدّك تجي ع لبنان؟ اشتريت الشقة تا تصير تجذبك. يمكن المشكله بالبوسطة فزّعتك. نحنا محتاجين ليك.
رح بشّرك إني صرت عم انظم شعر عامي، انشالله قريباً ببعتلك شي يعجبك.
العزيز الغالي جوزاف بو ملحم كان عندو يوم تاريخي بعيمار. ألوف البشر حضرت الاحتفال.
أثرتني كتير عاطفة المغتربين نحو الوطن. ترك كل الناس، ورافقنا ع أكل الهريسي، لكن لحد هلّق ما قبل عزيمتي ع عين كفاع.
يمكن المغتربين معجوقين فيه، ووقتو ضيّق. رح حاول بعد. وبكل مرة بتكون انت اللازمة او الردة.
باعتلك كم "فشّة خلق". الشي الما بيعجبك لا تنشرو أحسن ما القراء ينشروني. على كل حال بتضل لساناتن أخف وطأة من لسانك. بتعجّب كيف خلولك هاللسان اللي بمليون فراشي.
باعتلك "مناجم وأهراء"، عطي رأيك بصراحه، لا تنشر عرضي ولا توفّرني.
سلم لي ع الاساتذه بطرس عنداري واكرم المغوّش وايلي ناصيف، كان واعدني انو بدّو يجي ع لبنان ويفتح شغل. مأكّد انت غيرتلو فكرو، وصرت تخبرو عن الشوفاريي بطرابلس، ومشاكل البوسطات، وسواقة محسوبك، اللي انت وحدك ما عجبتك، وهون عجبت كل الرجال والستات.
أيش عم تكتب بهالأيام؟ مين لاهيك؟
سلوى وسمير وسامي بيسلمو عليك. لا تطوّل علينا.
جبيل 8/9/2000
**
